و ذكر اولنان بيوك صنمك برالنى باشى آلتنه و برالنى اويلوغى اوزرينه قويوب تمام مطلا قلمشلردر . رنكارنك لباسلر كيديروب نامنى شامكونى قومشلر ايدى . فوج فوج كافرلر كلوب اول صنمك اوكنده سجده ايدرلردى . و اول بنانك طشره سنده و بربرينك يانلرنده كاربانسراى كبى اوطه‌لر وار ايدى كه هر برى زربفت پرده‌لر و يالديزلى كرسيلر و صندليلر و شمعدانلر و چينى صراحيلر و سائر آرايش ايله كويا برر تپخانه ايدى . و بو وجه اوزره شهر مزبورده اون معظم پتخانه وار ايدى . و شهر مزبورده اون بش طبقه‌لى بر مثمن كوشك ياپوب هر طبقه سنده بر قارشدن بر زراعه وارنجه خرده و بزرك منظره‌لر و مقرنس ايوانلر و غرفه‌لر ياپوب مثلا تخت اوزرنده بر پادشاه و صاغنده و صولنده هربرى بر خدمته مشغول صورتنده كوناكون تصويرلر ياپمشلر ايدى . آشاغى طبقه سنه ديولر تصوير ايدوب ذكر اولنان كوشكى اوموزلرنده طوتارلر كبى كوسترمشلر ايدى . بو كوشك بالجمله آغاجدن اولوب دوره‌سى يكرمى زراع و ارتفاعى اون ايكى زراع ايدى . و بر مرتبه ده مطلا ايتمشلر ديكه كورن آلتوندن ياپلمش ظن ايدردى . و كوشكك آلتنه بر سردابه و اول سردابه‌ده بر تيمور ميل ياپوب ميلى كرسى اوزرينه نصب اوجنى قصر مزبورك آلتنه وضع ايدوب اول سردابده جزئى حركت